Մասսայական անհնազանդության խաղաղ ցույցերը հանգեցրին հնացած ու կոռումպացված ռեժիմի փլուզմանը: Այն կոչվեց Թավշյա հեղափոխություն, քանի որ մարդիկ ժողովրդավարության աննախադեպ հաղթանակի հասան առանց որևէ կրակոցի: Անհնազանդության գործողությունները փոքրամասնությունների համար պատմական ու շրջադարձային կետ դարձան:
«ԼԳԲՏԻ ակտիվիստները անհնազանդությունների ամենաակտիվ մասնակիցներից էին: Հասարակությունը սկսեց հասկանալ, որ մենք նույնպես հայրենասեր ենք, պայքարում ենք արդարությունը բոլորին հասանելի դարձնելու համար»,- պատմում է ԼԳԲՏԻ ակտիվիստ Արման Սահակյանը:
ԼԳԲՏԻ անձինք Հայաստանում առերեսվում են համատարած նախապաշարմունքի, խարանի ու խտրականության: Այդ պատճառով էլ շատ անհատների համար դժվար էր ընդգրկվել և ձայն բարձրացնել հեղափոխության ժամանակ:
ԱՎԵԼԻ ԱՆՎԱԽ ԵՆՔ
«Մեր համայնքը ավելի անվախ է դարձել: Տրանս անձինք դա ապացուցում էին՝ այլ ցուցարարների հետ փողոցներում անքուն գիշերներ անցկացնելով: Ամենուր սիրալիր մթնոլորտ էր ստեղծվել մի նպատակի շուրջ՝ տապալել կոռումպացված ռեժիմը և նոր Հայաստան կառուցել»:
Հեղափոխությունը դեռևս չի ավարտվել: Նոր կառավարության ռուսամետ ընդդիմադիրները պնդում են, որ ԱՄՆ-ն և ԵՄ-ը այլասերում են բերում Հայաստան՝ կազմաքանդելու հայ ավանդական ընտանիքները և երկիրը: ԼԳԲՏԻ անձանց խնդիրները դեռևս չափազանց հակասական են, և հիմա օրակարգի փոփոխությունը կախված է նոր կառավարությունից ու մարդու իրավունքների շարժումից:
ԸՆԴՈՒՆՎԱԾ ՉԵՆՔ
«Մենք մեր ուժերի ներածին չափով անում ենք ամեն բան՝ մարդու իրավունքների շարժման անբաժանելի մասը դառնալու համար: Մեզ համար չափազանց դժվար է, քանի որ Հայաստանում մարդու իրավունքների պաշտպանները դեռևս չեն ընդունում մեր իրավունքները որպես մարդու իրավունքներ»:
Մարդու իրավունքներով զբաղվող միջազգային կազմակերպությունները սատարում են Հայաստանում քաղաքացիական հասարակության և ժողովրդավարության ձևավորմանը:
«Մենք երախտապարտ ենք աջակցության համար: Նորվեգիայի Հելսինկյան կոմիտեն Հայաստանում հավասարության և ժողովրդավարության տարածման հարցում մեծ դեր ունի»,- ասում է Արման Սահակյանը:
Աղբյուրը՝ Նորվեգիայի Հելսինկյան Կոմիտե